မြန်မာတပ်မတော်သည် ဒီမိုကရေစီနှင့် ပြည်သူတို့၏ ရွေးချယ်မှုများကို လေးစားသင့်သည်။

ကျွန်ုပ်တို့သည် လိင်စိတ်ကိုင်းညွတ်မှု၊ လိင်ဝိသေသခံယူမှုနှင့် ထုတ်ဖော်ပြသမှု၊ လိင်လက္ခဏာ အမှတ်အသား (SOGIESC) တို့ မတူညီကွဲပြားသောသူတို့၏ တစ်ဦးချင်း လူ့အခွင့်အရေး တိုးတက်မှုဆိုင်ရာ အဖွဲ့အစည်းများနှင့် ကွန်ရက်များဖြစ်ကြပါသည်။ ကျွန်ုပ်တို့သည် ၂၀၂၁ခုနှစ်၊ ဖေဖော်ဝါရီလ (၁) ရက်နေ့တွင် ဖြစ်ပေါ်ခဲ့သော မြန်မာနိုင်ငံ၏ အရပ်ဘက်အုပ်ချုပ်ရေးအပေါ်တွင် စစ်အာဏာသိမ်းမှုနှင့် ၄င်းတို့၏တိုက်ခိုက်မှုအား ပြင်းထန်စွာ ရှုတ်ချလိုက်ပါသည်။ ကျွန်ုပ်တို့သည် ၂၀၂၀ခုနှစ်၊ နိုဝင်ဘာလတွင် ကျင်းပခဲ့သော မြန်မာနိုင်ငံအထွေထွေရွေးကောက်ပွဲမှတစ်ဆင့် တရားဝင်ကောက်နှုတ်ခဲ့သော မြန်မာ့ဒီမိုကရေစီလမ်းစဉ်ကိုသာ အခိုင်အမာအတည်ပြုကာ ထောက်ခံပါသည်။

မြန်မာနိုင်ငံသည် အခက်အခဲများနှင့် အားနည်းချက်များရှိနေစဉ်တွင် ၄င်း၏ ဆယ်စုနှစ်တစ်ခုကြာခဲ့ပြီဖြစ်သော ဒီမိုကရေစီအကူးအပြောင်းကာလမှစ၍ မတူညီကွဲပြားသော၊ အားလုံးပါဝင်မှုရှိသော၊ ပူးပေါင်းဆောင်ရွက်နိုင်သော ဒီမိုကရေစီအရွေ့ခရီးဆီသို့ ရောက်ရှိနေပြီးဖြစ်သည်။ ဤလုပ်ငန်းစဉ်သည် မြန်မာနိုင်ငံတွင်ရှိသော LGBTIQ+ အဖွဲ့အစည်းများနှင့် တက်ကြွလှုပ်ရှားသူများအပါအဝင် အရပ်ဘက်လူမှုအဖွဲ့အစည်းများထံမှ လွှမ်းခြုံမှုကျယ်ပြန့်၍ အဓိပ္ပာယ်ရှိလှသော ပါဝင်မှုကိုလည်း ဖြစ်ပေါ်စေခဲ့သည်။ ယခုစစ်အာဏာသိမ်းမှုသည် ထိုတိုးတက်မှုလုပ်ငန်းစဉ်များအားလုံးကို ပြောင်းပြန်လန်စေသော အန္တရာယ်အဖြစ်ရပ်တည်ကာ ခြိမ်းခြောက်လျက်ရှိသည်။

အရပ်ဘက်အုပ်ချုပ်မှုမရှိပါက မြန်မာနိုင်ငံရှိ ပြည်သူလူထုတို့သည် အခြေခံအခွင့်အရေးမဲ့ပြီး ဆုံးဖြတ်ချက်ချခြင်းလုပ်ငန်းစဉ်များမှ ဖယ်ရှားခြင်းခံရမည်ဖြစ်သည်။ ဒီမိုကရေစီမရရှိပါက ပြည်သူလူထုများ၊ အထူးသဖြင့် ဘေးဖယ်ခံအုပ်စုများသည် လူ့အခွင့်အရေးချိုးဖောက်မှုများကို ပြင်းထန်စွာခံစားကြရမည်ဖြစ်သည်။ ပြည်သူလူထု၏ သဘောထားကွဲလွဲမှုများကို ကြောက်ရွံ့ကာ စစ်အစိုးရသည် ပြည်သူလူထု၏ လွတ်လပ်စွာထုတ်ဖော်ပြောဆိုခွင့်၊ ဆက်သွယ်ရေးလိုင်းများ၊ လူမှုဆက်သွယ်ရေးကွန်ယက်များကို ဖြတ်တောက်ခြင်းဖြင့် သတင်းအချက်အလက်ရယူခွင့်တို့ကို တရားမဝင် ပိတ်ပင်တားမြစ်လျက်ရှိသည်။

ကျွန်ုပ်တို့သည် စစ်အစိုးရအား အရပ်ဘက်အုပ်ချုပ်ရေးကို ချက်ချင်းပြန်လည်ဖော်ဆောင် ပေးပါရန်၊ တရားလက်လွတ် ဖမ်းဆီထိန်းသိမ်းထားသူများ၊ နိုင်ငံရေးအကျဉ်းသားများ၊ အပြည်ပြည်ဆိုင်ရာ လူ့အခွင့်အရေးဥပဒေနှင့်အညီ လူ့အခွင့်အရေးကာကွယ်စောင့်ရှောက်သူများအားလုံးကို ဘေးကင်းစွာ ခြွင်းချက်မရှိ ပြန်လည်လွှတ်ပေးရန် လေးနက်စွာတိုက်တွန်းလိုက်သည်။

သို့ဖြစ်ပါ၍ နောက်ဆုံးတွင် ကျွန်ုပ်တို့သည် စစ်တပ်အား မြန်မာနိုင်ငံရှိ ပြည်သူလူထု၏ သဘောထားဆန္ဒများကို လေးစားရန် တိုက်တွန်းလိုက်သည်။ ထိုနည်းတူစွာ ရွေးကောက်ပွဲဆိုင်ရာ မမှန်မကန် စွပ်စွဲချက်မှန်သမျှတို့သည်လည်း ၄င်း၏ဖွဲ့စည်းပုံအခြေခံဥပဒေမှ ချမှတ်ထားသော လုပ်ငန်းစဉ်များမှတစ်ဆင့် တရားဝင်ကိုင်တွယ်ဖြေရှင်းရမည်ဖြစ်ပါသည်။

အာဆီယံအဖွဲ့ကြီးအနေဖြင့်လည်း မြန်မာနိုင်ငံ၏ ဒီမိုကရေစီနှင့် တရားဥပဒေစိုးမိုးရေးတို့ကို ပြန်လည်ဖော်ဆောင်နိုင်ရန်အတွက် ရှင်းလင်းတိကျသော၊ ရဲရင့်သော၊ အဓိပ္ပာယ်ရှိသော၊ ထိရောက်သောခြေလှမ်းများကို တာဝန်ယူဆောင်ရွက်ပေးပါရန် လေးလေးနက်နက် တောင်းဆိုလိုက်သည်။ အာဆီယံသည် မြန်မာ့စစ်တပ်၏ အကြမ်းဖက် အုပ်ချုပ်မှုများကို မျက်ဝါးထင်ထင် တွေ့မြင်နေပြီဖြစ်သောကြောင့် ပွဲကြည့်ပရိသတ်အဖြစ် နှုတ်ဆိတ်မနေသင့်တော့ပါ။

အပြည်ပြည်ဆိုင်ရာအဖွဲ့အစည်းများအနေဖြင့်လည်း မြန်မာပြည်သူပြည်သားများနှင့်အတူ သွေးစည်းလုံးညီညွတ်မှုကို ဖော်ပြပေးပါရန် ကျွန်ုပ်တို့တိုက်တွန်းလိုက်သည်။ အစိုးရများ၊ ကုလသမဂ္ဂအဖွဲ့အစည်းများနှင့် အခြားသောအပြည်ပြည်ဆိုင်ရာ အမှုဆောင်တာဝန်ရှိသူများအား အနီးကပ်အခြေအနေစောင့်ကြည့်ပေးရန်၊ ဘေးဒဏ်သင့်ပြည်သူများထံမှ ဆက်သွယ်ရေး လက်ခံရရှိပေးရန်နှင့် အချိန်မီတုန့်ပြန်ဆောင်ရွက်ပေးရန်လည်း တိုက်တွန်းလိုက်သည်။ စစ်တပ်အားပစ်မှတ်ထားသော လုပ်ဆောင်ချက်များအပါအဝင် အပြည်ပြည်ဆိုင်ရာ တုန့်ပြန်ဆောင်ရွက်ချက်များကိုလည်း လူ့အခွင့်အရေးဆိုင်ရာစံချိန်စံညွှန်းများအတိုင်း လုပ်ဆောင်ကြရန် တောင်းဆိုလိုက်သည်။

ကျွန်ုပ်တို့သည် မြန်မာပြည်သူလူထု၊ အရပ်ဘက်လူ့အဖွဲ့အစည်းများနှင့် LGBTIQ အဖွဲ့အစည်းများနှင့်အတူ တသားတည်းညီညွတ်စွာ ရပ်တည်လျှက်ရှိသည်။ ကျွန်ုပ်တို့သည် ဤတိုက်ပွဲတွင် အတူတကွပင် ရုန်းကန်ကြရမည် ဖြစ်သည်။ ကြံ့ခိုင်သန်မာ၍ သတ္တိရှိနိုင်ကြပါစေ။

ဒီမိုကရေစီကို ပြန်လည်ရရှိဖော်ဆောင်ကာ တရားဥပဒေစိုးမိုးရေးကို ထောက်ခံရမည့်အရေးမှာ ကျွန်ုပ်တို့အားလုံး၏ ဘုံတာဝန်သာဖြစ်သည်။

အောက်တွင်ဖော်ပြထားသော အဖွဲ့များသည် သဘောတူထောက်ခံကြောင်း လက်မှတ်ရေးထိုးလိုက်သည်။

(မှတ်ချက်။ ဖြည့်စွက်ထောက်ခံလိုသော အဖွဲ့အစည်းများအနေဖြင့် သင့်အဖွဲ့အစည်း၏ နာမည်နှင့်နိုင်ငံကို Comment အဖြစ်ရေးပေးပါရန် တောင်းဆိုအပ်ပါသည်။ ကျေးဇူးတင်ပါသည်။)